SHAIRI

NI WAPI TUMEKOSEA?

Mhadhara nafungua, halaiki karibuni,

Hoja yangu naitoa, kwa makini nyambueni,

Msipandwe na hisia, mkavuruga amani,

Yangu hoja inahoji, NI WAPI TUMEKOSEA?

Tumetenda ndivyo sivyo, kwa kuwaza sivyo ndivyo,

Kwangu mimi ndivyo hivyo, yote nimeona hivyo,

Nanyi wazeni vilivyo, mnene kama ilivyo,

Yangu hoja inahoji, NI WAPI TUMEKOSEA?

Maisha bora ya wapi, ari mpya nayo ipi!

Na kasi mpya i wapi, na nguvu mpya ni ipi!

Mkukuta uko wapi, mkurabiti ni vipi!

Yangu hoja inahoji, NI WAPI TUMEKOSEA?

Misitu yatulilia, wanyama wanapotea,

Madini yana pepea, hakuna wa kuzuia,

Tumepuuza wosia, hamnazo kujitia,

Yangu hoja inahoji, NI WAPI TUMEKOSEA?

Aridhi wametoboa, fuko wamewachukua,

Mashimo yamebakia, uridhi wa vizalia,

Laana ya ng’ang’ania, kizazi hata vizazi,

Yangu hoja inahoji, NI WAPI TUMEKOSEA?

Dira imetokomea, asilani si mzaha,

Baraka yawa balaa, na raha yawa karaha,

Kaka ana chekelea, kabwela ni mbaya siha,

Yangu hoja inahoji, NI WAPI TUMEKOSEA?

Tulidhani mkulima, shamba tukamkabidhi,

Tukidhani analima, kumbe kaleta wahodhi,

Kweli kaka maamuma, naomba mniwe radhi,

Yangu hoja inahoji, NI WAPI TUMEKOSEA?

Ashakum si matusi, kwa kuminya kidudusi,

Mhadhiri sijatusi, kukosoa si kutusi,

Nanyi pia msitusi, watusio maarasi,

Yangu hoja inahoji, NI WAPI TUMEKOSEA?

Eric F. Ndumbaro OFM Cap

0755978786